Stúdentar MA 1978

Pakkað í pottinn... komust færri en vildu!

2008-07-03T10:47:00.002+01:00

Myndir Helenu úr Höllinni. Smellið á myndirnar til að stækka þær.....

2008-07-02T16:07:00.023+01:00

Nokkrar myndir frá Simma:

2008-07-02T15:59:00.008+01:00

Ja hérna!

2008-06-18T00:50:00.005+01:00

Eftir 25 ára afmælið hélt maður að óvissuferðin þá yrði ekki toppuð.

En svo tókst þeim það.

Að fara með 55 fimmtuga (eða þar um bil) MA-stúdenta í flúðasiglingu er náttúrlega bara snilld. Verst að eiga engar myndir af hasarnum.

Álftagerðisbræður og Geirmundur áttu kvöldið, en ísbjörninn sem var pantaður varð heldur seinn fyrir.

Hafið kæra þökk fyrir, þið sem skipulögðuð þetta.

Svo var hátíðin í Höllinni frábær að vanda. Við slógum aftur í gegn með flutningi okkar á Emmu, og kveðjunni frá Adam var skilað til Tryggva sem gladdist mjög.

Hörðustu djammararnir voru að príla yfir girðinguna kringum Lystigarðinn í morgunsárið.....

Þetta var frábært. Takið strax frá 14. - 17. júní 2013 fyrir 35 ára afmælið.

Og það heldur áfram.....

2008-06-15T11:31:00.007+01:00

Smellið á myndirnar til að sjá þær í fullri stærð.

Og svo er það óvissuferðin!

Fjörið er byrjað!

2008-06-14T20:06:00.011+01:00

Það hófst í dag með 4 tíma fjallgöngu upp að skólavörðunni og þaðan út og suður um alla Vaðlaheiði. Þetta var svokölluð sukkjöfnun - eftir þessa æfingu má sukka helling.

Vonandi skilaði héraðsdómarinn sér til baka - ef ekki þá kannski sækjum við hann á morgun.

Svo er það Vélsmiðjan í kvöld og óvissuferðin á morgun.

Það er bongóblíða nú og næstu daga. Eins og alltaf þegar við mætum til að júbílera.

Fjallganga, bekkjarpartý, óvissuferð, MA-hátíð!

2008-06-10T12:11:00.005+01:00

Þá er nú endanlega komið á hreint hvernig dagskráin okkar verður um næstu helgi.

Á laugardag, 14. júní, er mæting á bílastæðinu við Gamla skóla kl. 12, sameinast í bíla og ekið yfir í Vaðlaheiði þar sem gengið verður upp að skólavörðunni og steinum bætt í hana. Um kvöldið hittumst við svo í bekkjarpartýi á efri hæð Vélsmiðjunnar sem við höfum út af fyrir okkur frá kl. 21 til miðnættis.

Sunnudaginn 15. júní mætum við kl. 11:00 á bílastæðinu við MA til að halda í óvissuferð sem standa mun fram yfir miðnætti (áætluð heimkoma er um kl. 01:00). Hafið með ykkur hlý föt, sundföt, Sjallaföt og peninga (reiðufé, engin kort) til að greiða fyrir drykki um kvöldið. Ekki þarf að hafa nesti meðferðis. Það lítur vel út með mætingu, fjöldinn er kominn í 59 við síðustu talningu.

Mánudaginn 16. júní er svo MA-hátíð í Íþróttahöllinni, sem hefst með fordrykk kl. 18:00. Munið að skrá ykkur á www.bautinn.muna.is ef þið eruð ekki búin að því, og sækja svo miðana 15. eða 16. júní milli kl. 13 og 17. Glæsilegur þríréttaður matseðill, skemmtiatriði og söngur. Við 30 ára stúdentar verðum kölluð fram á gólf til að syngja Emmu (sem þýðir að við þurfum að æfa okkur í óvissuferðinni).

Hljómsveitin Í svörtum fötum leikur fyrir dansi en einnig munu þeir Hermann Arason og Níels Ragnarson leika fyrir dansi á efri hæð hússins.

Þetta verður frábært!

Þetta er allt að koma

2008-06-05T15:34:00.009+01:00

Það tínast inn skráningar í óvissuferðina, fjöldinn kominn yfir 50 manns og enn ekki (alveg) búið að loka fyrir skráningar. Þið sem enn eigið eftir að skrá ykkur eruð beðin að gera það sem fyrst, sjá leiðbeiningar hér neðar á síðunni.

Þessar myndir síðan síðast eru frá Friðjóni 6-X.

Aldurstengd gleymska ... eða bara fattleysi?

2008-05-22T22:07:00.003Z

Þið mættuð nú vera duglegri að skrá ykkur börnin góð. Því verður ekki trúað að mætingin ætli að vera eitthvað léleg, líklegra er að þið séuð orðin öldruð og gleymin og fattið ekki að það þarf að skrá sig í óvissuferð og á MA-hátíð, og það frekar fyrr en seinna.

Muniði eftir gömlu júbílöntunum þegar við útskrifuðumst? Tuttugu ára stúdentar (t.d. Tryggvi Gíslason!) og þaðan af eldri - þetta var nánast á grafarbakkanum í okkar augum. Eiginlega bara brjóstumkennanlegt að þessir eldri borgarar skyldu vera að reyna að skemmta sér af veikum mætti.

En vitiði hvað? Stúdentar 1968, 40 ára júbílantar, láta ekki deigan síga og í þeirra hópi er mætingin komin upp í 77%. Ekki getum við látið það spyrjast um okkur að við séum eftirbátar þeirra í djamminu - kommon, þau eru að skríða á sjötugsaldurinn!!!

Skráið ykkur fyrir 31. maí, það skiptir máli upp á skipulagninguna að vita með góðum fyrirvara hversu margir mæta. Upplýsingar um skráningu er að finna hér aðeins neðar á síðunni. Munið líka að greiða fyrir óvissuferðina sem fyrst.

Svo ítreka ég óskir um að fá myndir frá síðasta afmæli (eða enn eldri) til birtingar á síðunni (sendið þær á gudrun(at)stadlar.is). Sennilega þýðir ekkert að óska eftir meira en 30 ára gömlum skemmtisögum, sá brunnur var líklega þurrausinn fyrir fimm árum, eða hvað? En ef þið eigið einhverjar slíkar þá megið þið senda mér þær eða skrifa í athugasemdir (ef þið finnið út úr því hvernig á að gera það - ekki öllum gefið, ég veit það).

Það eru bara rúmar þrjár vikur til stefnu. Hæ, hó, jibbí jei..... :-)

Vistarverur

2008-05-18T23:56:00.003Z

Þið sem voruð vistarverur: munið þið eftir þessum réttum í mötuneytinu (stolið frá Nönnu systur)?

Hjólbarðar
Felgur
Nagladekk
Kjöt í myrkri
Skóbætur
Gamla konan sem dó
Slys
Járnbrautarslys
Fiskur í vatni
Blóð og gröftur / Gula hættan /Dularfulla eyjan
Gult vatn með bitum
Græna vatnið
Túrtappavatn/túrsúpa
Teygjugrautur
Handsprengjur
Indjánabellir
Svertingjabellir
Eyvindur með hor
Eyvindur í sparifötunum

Mig minnir að þetta hafi allt smakkast þokkalega vel.

Eða ekki.

Spilagaldrar og púrtvín

2008-05-13T23:04:00.001Z

Friðjón er sem sagt að æfa nýja spilagaldra.

Og vefstjórinn dottin í púrtvínið.

Meira um óvissuferð

2008-05-13T21:42:00.005Z

Nýjar upplýsingar frá norðanfólkinu vekja öfund í huga okkar sunnanmanna. Meðan nefndin hér fyrir sunnan hittist heima hjá Þórunni og fær gamla jólaköku (nema Kalli hafi komist í bakaríið), þá sitja þau fyrir norðan og sulla í rauðvíni. Hér eru skilaboð frá Hadda (prófarkalesin vegna rauðvínsins):

"Mæting kl. 11 þann 15. júní við MA og eiga menn að vera vel búnir til útivistar, gott að vera í ullarnærfötum og flísfötum, hlífðarfötum yfir og í gönguskóm eða góðum íþróttaskóm. Gott að hafa ísöxi, 8 karabínur, brodda, ísskrúfur og línu..... oh shit, þetta er búnaðarlistinn frá Magga fyrir vorferðina. Verið þið óhrædd, þetta verður létt ferð og setið mestallan tímann, þið megið semsagt sleppa ísöxinni og því dóti. En nauðsynlegt að vera vel klæddur, maður veit aldrei hvenær rignir og blæs á Íslandi. ... Það verður sungið, trallað og hlustað á frábæra tónlist frá gullaldarárum okkar. (Muniði plötusnúðinn í Lóninu forðum). Ekki má gleyma skjóðunni með sundfötunum og sjallabuxunum. Ekki þarf að nesta sig til ferðarinnar, en hafa smá pening með til að kaupa drykki um kvöldið. Ef einhver sér sér ekki fært að vera með allan daginn má hringja í símsvara eftir kl. 15 þann fimmtánda og fá upp staðsetningu hópsins um kvöldið, símanúmerið er 462-7102. Ekkert þýðir að svala forvitninni og hringja fyrir þennan tíma nema menn óski eftir tanndrætti eða viðlíka þjónustu."

Því er svo við þetta að bæta að nefndin er að sjálfsögðu þögul sem gröfin um hvert ferðinni verður heitið, en óljósar vísbendingar gætu átt við Kolbeinsey. Eða Dubrovnik. Whatever.

Þið eruð beðin að skrá ykkur sem fyrst í óvissuferðina (sendið tölvupóst á gudrun(at)stadlar.is og takið fram hvort maki er með). Kostnaður er 11.000 kr á mann og þarf að greiðast fyrirfram.
Banki 528 - Hb 26 - Reikningur nr. 7801 - Kennitala 220658-6279 (Sigurður Heiðar). Látið senda greiðslukvittun á netinu á shs(at)deloitte.is þar sem fram kemur nafn og bekkur (A, B, ...) stúdents sem greitt er fyrir.

Munið hvað var gaman síðast!

Tíminn er eins og vatnið.....

2008-05-13T21:36:00.003Z

Á milli þessara tveggja mynda liðu rúmlega 25 ár. Tíminn hefur farið höndum um piltana, gleraugun hafa einhvern veginn færst af Nonna yfir á Óðin, hárafarið hefur svolítið breyst, en sælan er söm, gott ef ekki meiri á síðari myndinni.

Upprifjun og upphitun

2008-05-13T20:46:00.007Z

Er ekki kominn tími til að rifja upp Emmu? (Smellið á myndirnar til að sjá þær í fullri stærð.)

Við sungum hana svo asskoti vel hérna um árið - Tryggvi meira að segja klökknaði.

Þessar tvær skemmtu sér vel í Höllinni á 25 ára afmælinu.

Skráning er hafin!

2008-04-27T22:26:00.003Z

Jájá, skráningar byrjaðar að streyma inn, bæði í óvissuferð og á hátíðina í Höllinni (formleg skráning á hana er reyndar á Bautavefnum, sjá hér til vinstri). Endilega skráið ykkur sem fyrst, skv. leiðbeiningum í síðasta tölvupósti.

Rétt er að vekja athygli á því að öllum eldri stúdentum ber saman um að hvert stúdentsafmæli sé skemmtilegra en það síðasta. Það er held ég líka reynsla okkar sem síðast fögnuðum 25 ára afmæli - reyndar sér maður fyrir sér að það gæti orðið erfitt að toppa það, en ég er vongóð!

Kannski er óvissuferðin sem Haddi og co. eru að skipuleggja til Dubrovnik, sem við ætluðum að heimsækja í skólaferðalagi fyrir 31 ári? Það væri nú stíll yfir því! Alveg er ég viss um að það væri hægt að fara fram og til baka á 13 tímum og hafa gaman af. Flugvélamatur og bjór, dansað á ganginum í vélinni - og tánum dýft í Adríahafið í tvær mínútur eða svo. Þetta með símsvarann og rútuna er bara til að villa um fyrir okkur. Ekki satt Haddi?

Nei, trixið við óvissuferðir er einmitt óvissan - hvert verður farið. En vissan er að við verðum með góðu fólki (dööhh!), og að það verður gaman. Í þrettán tíma. Minnst.

Hvar verður ÞÚ eftir réttar 7 vikur? Í óvissuferð - nema hvað!

MA-hátíðin þann 16. júní

2008-04-21T17:01:00.004Z

Nú höfum við fengið upplýsingar frá 25 ára stúdentum um fyrirkomulag hátíðahaldanna í Íþróttahöllinni að kvöldi 16. júní.

Hátíðin mun hefjast með fordrykk í anddyri Íþróttahallarinnar um kl. 18:00 og síðan verður þríréttað glæsilegt borðhald. Árgangar sitja saman til borðs.

Á dagskrá verður söngur, ræðuhöld og skemmtiatriði, og að venju munu eins árs stúdentar fá gólfið um miðnætti til að kasta hvítu kollunum.

Dansað verður til kl. 03:00 við undirleik hljómsveitarinnar “Í svörtum fötum”. Reynt er að stilla miðaverði á hátíðina í hóf og hefur verðið verið ákveðið 8700 kr. fyrir aðra en eins árs stúdenta. Ef aðeins er keyptur miði á dansleik kostar hann 3000 kr.

Skráning á hátíðina er hafin í gegnum vef Bautans; www.bautinn.muna.is, sjá einnig tengil hér vinstra megin á síðunni. Þar má einnig finna matseðil kvöldsins, sem er glæsilegur að vanda.

Það er ekki eftir neinu að bíða með að skrá sig!

Vissa um óvissu.....

2008-04-20T21:28:00.006Z

Jæja gott fólk. Nú er farin að skapast einhver vissa í kringum óvissuferðina okkar sem fyrirhuguð er þann 15. júní næstkomandi. Ónefndur tannlæknir á Akureyri, sem gat sér nokkuð gott orð með skipulagningu óvissuferðar fyrir fimm árum, hefur eitthvað verið að spá í hlutina með fleiri norðanmönnum og vill nú koma eftirfarandi á framfæri:

- það verður mjög mjög gaman og menn fá mikið fyrir peninginn sem þetta kostar,
- útivist, létt hreyfing (Mullers-æfingar (sitjandi eða liggjandi) að beiðni Friðjóns), fagurt landslag (enda fyrir norðan), skemmtilegt fólk (við), söngur (Emma, Steinar o.fl.), glens og gaman,
- Óðinn heldur enga ræðu núna.

Hvað er hægt að biðja um meira?

Planið er að mæta við skólann okkar kl. 11:00 sunnudaginn 15. júní, þegar sannkristnir mæta til messu, og leggja af stað í ferðalag korter yfir. Heimkoma er áætluð kl. 01:00 eftir miðnætti aðfaranótt mánudags, þannig að þetta eru þrettán tímar af óvissu.

Allir þurfa að vera klæddir til útivistar, en hafa skal skjóðu með og í henni sundföt og dansskóna ásamt viðeigandi fötum (Sjallabuxur (sjá lýsingu hér, efsti póstur, 3. greinaskil: http://www.skrin.is/ma78/) verða sérstaklega verðlaunaðar). Ekki þarf að hafa með mat og drykk, en gott er að hafa einhverja seðla því að hægt verður að kaupa létta söngolíu á sanngjörnu verði með kvöldmáltíðinni sem fram verður borin.

Ef af einhverjum óviðráðanlegum orsökum einhver sér sér ekki fært að vera með allan daginn verður hægt að fá upplýsingar um hvar þessi kvöldmáltíð verður fram borin, á símsvara eftir kl. 15:00 þann 15. júní. (Símanúmer gefið upp síðar.)

Kostnaður gæti orðið 10-11 þúsund íslenskar krónur á mann (á gengi dagsins í dag), en hverri krónu vel varið og engin spilling eða risna hjá nefndinni (segir tannlæknirinn). Kvöldmatur og dansskemmtun mundi kosta 6000 íslenskar krónur á mann, en þá þurfa menn að koma sér sjálfir á staðinn, og geta svo teikað rútuna heim til Akureyrar.

Innan skamms munum við í nefndinni krefja ykkur svara um hvort þið hyggist mæta í óvissuna, sem og MA-hátíðina að kvöldi 16. júní í Íþróttahöllinni.

Confused? You won't be after next week's episode of ... MA1978!

Það fer að bresta á.....

2008-03-25T15:18:00.003Z

Já, það fer alveg að bresta á, 30 ára stúdentsafmælið okkar. Hér ætlum við nú að hefja upphitun fyrir fjörið og bjóðum ykkur öllum að taka þátt, með því að skrifa athugasemdir hér neðan við hvern pistil. Það hefur að vísu vafist eitthvað fyrir jafnvel hámenntuðum doktor að finna út hvernig það er gert, þótt það sé eiginlega mjög einfalt.....

Eins og stendur hér í fyrri pistli þá er meiningin að skipulagið verði mjög svipað og síðast: ganga upp að skólavörðunni og partý um kvöldið laugardaginn 14. júní, óvissuferð að hætti norðanmanna sunnudaginn 15. júní, og svo MA-hátíð í Höllinni að kvöldi 16. júní. Þetta getur ekki klikkað.

Það er rétt að benda fólki á að fara að huga að gistingu fyrir norðan þessa daga, t.d. á Hótel Eddu (hér er hægt að bóka herbergi: http://www.hoteledda.is/Hotelin/Akureyri/).

Þið megið mjög gjarna senda vefstjóra myndir síðan síðast (netfangið er gudrun@stadlar.is), eða sögur og endurminningar ef slíkt er ekki horfið í djúp gleymskunnar. Og endilega tjáið ykkur í athugasemdunum.

Það eru bara rúmar ellefu vikur eftir!

Undirbúningur 30 ára stúdentsafmælis hafinn

2008-02-10T17:44:00.000Z

Jæja, þá er undirbúningur að 30 ára stúdentsafmæli okkar hafinn. Nefndin hefur komið saman einu sinni heima hjá Þórunni og étið kökur. Svo mikið þurfti að spjalla að lítill tími gafst til að ræða fyrirkomulag afmælisins, svo við ákváðum bara að hafa þetta eins og síðast. Enda var það æðislegt.

Ákveðið var að Guðrún 6-X myndi sjá um vefsíðu eins og síðast. Gamli vefurinn okkar er enn til og stendur fyrir sínu - sjá hér: http://www.skrin.is/ma78/. Þar er m.a. að finna myndir, skemmtisögur, söngtexta og ræður síðan síðast.

Hér er aftur á móti meiningin að við bekkjarsystkinin getum sett inn athugasemdir, kveðjur og annað sem andinn blæs okkur í brjóst. Vonandi verður það vel nýtt.

Þegar dagskrá 30 ára afmælisins 14. - 17. júní verður orðin mótaðri verður farið að kanna þátttöku. Síðast var eitthvað yfir 70% mæting. Við stefnum að því að gera enn betur núna.

Takið strax frá dagana 14. - 17. júní 2008!